अनलाईन न्युजपाटी,जनकपुरधाम,समाचारदाता,जेठ २० गते।
जनकपुरधाम उपमहानगरपालिका–७ बसहिया रोडको एक बन्द घरमा सडेको अवस्थामा एक जनाको शव फेला परेको छ ।
अन्दाजी २५–३० वर्षका युवकको शव ७० प्रतिशत भाग सडेगलेर किराले खाएको अवस्थामा बुधबार दिउँसो फेला परेको हो । मृतक युवकको सनाखत हुन सकेको छैन ।
धनुषाका प्रहरीका प्रवक्ताका अनुसार उक्त घर लामो समयदेखि खाली थियो ।
बाहिरबाट ताला लगाएको घरको ओछ्यानमा सिरकले छोपेको अवस्थामा शव फेला परेको हो । दुर्गन्ध फैलिएपछि स्थानीयले प्रहरीलाई खबर गरेका थिए । प्रहरी टोलीले ताला तोडेर भित्र हेर्दा बेडमा सिरकले छोपिएको अवस्थामा शव फेला परेको मिश्रले बताए ।
शवलाई पोष्टमार्टमका लागि प्रादेशिक अस्पताल जनकपुरधाम ल्याइएको छ ।
घटना विषयमा थप अनुसन्धान भइरहेको डीएसपीले बताए ।