अनलाईन न्युजपाटी ,जनकपुरधाम,समाचारदाता,मंसिर १४ गते।
सिरहामा श्रीमतीको हत्या गरेको आरोपमा एक युवक पक्राउ परेका छन्।
पक्राउ पर्नेमा सिरहा नगरपालिका १५ सुखचैनाका ४० वर्षीय देवेन्द्र यादव रहेको जिल्ला प्रहरी कार्यालय सिरहाले जनाएको छ ।
गत बिहीबार राति आफ्नै श्रीमती ३० वर्षीया संजिता कुमारी यादवको हत्या पश्चात फरार रहेका उनलाई भारतीय सीमा नजिकबाट पक्राउ गरेको जिल्ला प्रहरी कार्यालय सिरहाका सूचना अधिकारी रवीन्द्रराज पाण्डेले जानकारी दिए।
घरायसी विवादका क्रममा श्रीमानले इँटा र भाटाले कुटपिट गरेको प्रारम्भिक अनुसन्धानबाट खुलेको प्रहरीले बताएको छ। गम्भीर घाइते भएकी उनलाई उपचारको लागि छिमेकी भारतीय बजार जयनगर लगेको सूचना प्राप्त हुनासाथ प्रहरीले खोजतलास र अनुसन्धान गर्दा हत्या गरी भारततर्फ लगेको खुलेको बताएको छ।
यादवलाई नियन्त्रणमा लिई सोधपुछ गर्दा भारतको मधुबनी जिल्लाको खजोली थानाअन्तर्गत सलरा भन्ने ठाउँको झाडीमा फालेको खुलेपछि भारतीय प्रहरीको सहयोगमा शव खोजतलास गरी फेला परेको प्रहरीले जनाएको छ।
यस सम्बन्धमा थप अनुसन्धान भइरहेको प्रहरीले जनाएका छन् ।