अनलाईन न्युजपाटी,काठमाडौँ,समाचारदाता,फाल्गुन १९ गते।
नेपाल सरकारले पाँच देशका नागरिकलाई एक महिनाका लागि भिसा अनअराइभलमा रोक लगाएको छ। नेपाल सरकार गृह मन्त्रालयले हङकङसहित चीन, इरान, इटाली, दक्षिण कोरिया र जापानका नागरिकलाई मार्च ७ देखि मार्च ३१ सम्म भिसा अनअराइभलमा रोक लगाएको हो ।
ती देशका नागरिक नेपाल आउनु परे सम्बन्धित देशमै रहेका नेपाली राजदूतावास र कूटनीतिक नियोगमार्फत कोरोनासम्बन्धी स्वास्थ्य परीक्षणसमेतको रिपोर्टका आधारमा आवश्यकता र औचित्य हेरेर भिसा लिन सक्नेछन् ।
अहिले इराकसहित १३ मुलुकका नागरिक बाहेक , अन्य देशका नागरिकले भने नेपालमै त्रिभुवन अन्तर्राष्ट्रिय विमानस्थलसहित अध्यागमनका सम्बन्धित कार्यालयमाफर्त प्रवेशाज्ञा अनुमति लिन पाउने व्यवस्था छ ।
मन्त्रिपरिषद् बैठकले कोरोना प्रभावित मुलुकबाट आउने नागरिकलाई भिसा जारीमा कडाइ गर्न गृह मन्त्रालयलाई निर्देशन दिएको थियो । गृहमन्त्रालयले परराष्ट्र मन्त्रालयसँग समन्वय गरेर अध्यागमन विभागमार्फत ५ मुलुकका नागरिकलाई भिसा अनआराइभलमा तत्कालका लागि रोक लगाएको हो ।