अनलाईन न्युजपाटी एजेन्सी,समाचारदाता,असार २३ गते।
भारतीय प्रधानमन्त्री नरेन्द्र मोदीले आज मन्त्रिमण्डल विस्तार गर्ने भएका छन् ।
दोस्रो कार्यकालमा मोदीले पहिलोपटक मन्त्रिमण्डल विस्तार गर्न लागेका हुन् ।
मंगलबार चार राज्यको राज्यपाल परिर्वतन गरिएपछि मन्त्रिमण्डल विस्तारको चर्चा थप चुलिएको थियो । नयाँ मन्त्रालय ‘मिनिस्ट्री अफ को–अपरेसन’ बनाइएपछि त मन्त्रिमण्डल विस्तार हुने पक्कापक्की बनेको थियो । बुधबार दूरदर्शन न्यूजले ट्वीट गर्दै साँझ ६ बजे सपथको समय तोकिएको जानकारी दिएपछि सबै अनुमानमा विराम लाग्यो ।
भारतीय मिडियाका अनुसार सत्ता समीकरणमा ध्यानमा राख्दै मन्त्रिमण्डल विस्तार गर्न लागिएको छ । हालसम्म २४ जनाको नाम फाइनल भएको दैनिक भास्करले उल्लेख गरेको छ ।
बीबीसी हिन्दीका अनुसार केन्द्रीय मन्त्रिमण्डलमा हाल ५० भन्दा धेरै मन्त्री रहेका छन् । लोकसभा सिटअनुसार क्याबिनेट ८१ सदस्यीयसम्म बनाउन सकिनेछ । त्यही भएर करिब २ दर्जन नयाँ मन्त्रीहरु थपिने अनुमान गरिएको छ ।