अनलाईन न्युजपाटी ,जनकपुरधाम,समाचारदाता,कार्तिक ११ गते।
महोत्तरीको भंगहा नगरपालिकामा दुई समुदायबीचको झडप उग्र रुप लिएपछि अनिश्चितकालीन कर्फ्यु आदेश जारी भएको छ ।
हिंसा नियन्त्रणमा लिन जिल्ला प्रशासन कार्यालय महोत्तरीले कर्फ्यु आदेश जारी गरिएको छ ।
भंगहा नगरपालिका–८ को दक्षिणमा पररियाको सम्पूर्ण क्षेत्र, उत्तरपूर्वमा ब्रह्मस्थान पररिया, उत्तरमा धरमपुरभन्दा दक्षिण, पूर्वमा लोहारपट्टी नगरपालिकाको वडा नम्बर १ मा पर्ने बगडाचोक, पश्चिममा इलाका प्रहरी कार्यालय लोहारपट्टीस्थित पुलसम्म प्रशासनले कर्फ्यु आदेश जारी गरेको प्रशासनले जनाएको छ ।
प्रशासनको जारी आदेशमा भनिएको छ, ‘उक्त स्थानमा भेला, जुलुस, प्रदर्शन, घेराउ, सभा जस्ता क्रियाकलाप गर्न नपाउने गरी स्थानीय प्रशासनको ऐन, २०२८ को दफा ६ क बमोजिम मिति २०७९-०७-१० गते १६:०० बजेदेखि अर्को आदेश नभएसम्मका लागि देहाय बमोजिमको चारकिल्ला भित्र कफ्र्यू आदेश जारी गरिएको छ ।’
बिहीबार बिहान करिब १० बजेतिर हिन्दु सेना सम्राटले मार्च पास निकालेका थिए। त्यसै क्रममा वडा नम्बर ८ स्थित पररियामा दुबै समूहबीच झडप भएको थियो। दुबैतर्फबाट भएको ढुंगामुढाको क्रममा सुरक्षाकर्मीसमेत गरी झन्डै एक दर्जन व्यक्ति घाइते भएको प्रहरीले जनाएका छन् ।