सीताराम विवाह महोत्सवमा सहभागी हुने श्रद्धालुहरुलाई स्वास्थ्य मापदण्डको परिपालना गर्न मुख्यमन्त्री लालबाबु राउतको आग्रह

अनलाईन न्युजपाटी,जनकपुरधाम,समाचारदाता,मंसिर २१ गते।

सीताराम विवाह महोत्सवमा सहभागी हुने श्रद्धालुहरुलाई स्वास्थ्य मापदण्डको परिपालना गर्न मुख्यमन्त्री लालबाबु राउतले आग्रह गरेका छन् ।

मुख्यमन्त्री राउतले विवाह महोत्सवको अवसरमा शुभकामना सन्देश जारी गर्दै कोरोना सङ्क्रमणको जोखिम कायमै रहेकाले स्वास्थ्य सतर्कता अपनाउन श्रद्धालुहरुमा आग्रह गरेका छन् ।

नेपाल र भारतबाट ठूलो संख्यामा श्रद्धालुहरु जनकपुरधाम आउने भएकाले कोरोनाको जोखिम बढ्न सक्ने जोखिमलाई दृष्टिगत गरी स्वास्थ्य सतर्कता अपनाउन मुख्यमन्त्री राउतले अपिल गरेका छन् ।

त्रेतायुगमा भगवान् राम र सीताको विवाह भएको स्मरणमा प्रत्येक वर्ष जनकपुरधाममा भव्यतापूर्वक सीताराम विवाह महोत्सव मनाउँदै आइएको छ । विवाह महोत्सवका अवसरमा प्रदेश २ सरकारले मंसिर २२ गते बुधबार सार्वजनिक विदा दिने घोषणा गरेको छ ।

यस्तै, जनकपुरधाम उपमहानगरपालिकाले विवाह महोत्सवलाई दृष्टिगत गरी नगरक्षेत्रका सामुदायिक तथा निजी विद्यालयमा तीन दिन सार्वजनिक विदा दिने निर्णय गरेको छ ।

जनकपुरधामको जानकी मन्दिरमा जारी सप्ताहव्यापी कार्यक्रम विवाह महोत्सवको उपलक्ष्यमा मङ्गलबारदेखि बिहीबारसम्म शिक्षण संस्था बन्द गर्ने निर्णय भएको जनकपुरधाम उपमहानगरपालिका मेयर लाल किशोर साहले जानकारी दिएका छन् ।

विवाह महोत्सव मेलाका कारण हुने भीडभाडलाई दृष्टिगत गर्दै पालिकाभित्र रहेका सामुदायिक, निजी विद्यालय तथा शिक्षण संस्थाहरुलाई मंसिर २१ देखि २३ गतेसम्म विदा दिने निर्णय भएको मेयर साहले जानकारी दिए ।

Leave a Reply

Your email address will not be published. Required fields are marked *