अनलाईन न्युजपाटी एजेन्सी,समाचारदाता,जेठ ११ गते।
मलेसियामा क्वालालम्पुर नजिकैको भूमिगत रेलमार्गमा दुई रेल ठोक्किँदा २ सय बढी यात्रु घाइते भएका छन्।
मलेसियाको पेट्रोनाज ट्वीन टावर नजिकैको टनेलमा सोमबार राति स्थानीय समयअनुसार पौने ९ बजे एउटा खाली रेल र अर्को यात्रुवाहक रेल ठोक्किएका हुन्।
विपरीत दिशामा गइरहेका दुबै रेल एउटै ट्र्याकमा भएकाले दुर्घटना भएको हो। तीमध्ये खाली रेल मर्मतपछि ल्याइएको थियो।
रेल वे ट्राफिकका कर्मचारीहरूले सञ्चार गर्दा फरक परेकाले दुबै रेल एउटै ट्र्याकमा कुदेको हुन सक्ने बताइएको छ।
घाइतेमध्ये ४७ जनाको अवस्था गम्भीर छ भने बाँकी सामान्य छन्।
मलेसियाका प्रधानमन्त्री मुहिद्दिन यासिनले दुर्घटनालाई गम्भीर भन्दै विस्तृत छानबिन गर्न निर्देशन दिएका छन्।