अनलाईन न्युजपाटी ,जनकपुरधाम,ज्योतिष,समाचारदाता,पुस ८ गते।
भारतको अयोध्यामा जनवरी २२ तारिखका दिन राम मन्दिरमा राम जीको प्राणप्रतिष्ठा हुने अवसरमा जनकपुरधामबाट भार पठाउने तयारी थालिएको छ ।
जानकी मन्दिरको अगुवाइमा जनकपुरधामबाट अयोध्यासम्म विशेष यात्रासहित यहाँको उपहार पठाइन लागेको जानकी मन्दिरका सहमहन्थ रामरोशन दास वैष्णवले जानकारी दिए ।
मिथिला परम्पराअनुसार छोरीको नयाँ घर निर्माण भई घरबासको अवसरमा माइती पक्षबाट आभूषण, लत्ताकपडा र वर्ष भरिको खानाको सामग्री पठाइने गरिन्छ । सोहीअनुरुप जानकीको माइती पक्ष जनकपुरधामबाट ती सामग्रीहरु पठाइन लागिएको जानकी मन्दिरका छोटा महन्थ तथा समितिका संयोजनक रोशन दासले जानकारी दिए ।
उनका अनुसार माघ ६ गते अयोध्यामा राम जन्मभूमि राममन्दिर ट्रष्टलाई उपहार हस्तान्तरण गर्ने योजनासहित माघ ४ गते जनकपुरबाट यात्रा प्रारम्भ हुनेछ ।
जनकपुरधामबाट जलेश्वरनाथ, मलङ्गवा, सिम्रौनगढ, गढीमाई, वीरगञ्ज हुँदै भारतको बेतिया, कुशीनगर, सिद्धार्थनगर गोरखपुरसम्म विधिन्न धार्मिकस्थलको दर्शन गर्दै अयोध्या पुग्ने कार्यक्रम छ ।