अनलाईन न्युजपाटी, रुकुम पश्चिम समाचारदाता भदौ १७ गते।
खुर्पा प्रहार गरी एक व्यक्तिले श्रीमतीको हत्या गरेका छन् । मुसिकोट नगरपालिका–३, माछिमीका २७ वर्षीय नवीन खड्काले २५ वर्षीया श्रीमती कमला बुढाथोकी खड्काको सोमबार राति हत्या गरेको जिल्ला प्रहरी कार्यालयले जनाएको छ ।अत्यधिक मदिरा सेवन गरी सोमबार तीजका दिन बेलुकी ८:00 बजेको समयमा नवीनले श्रीमती कमलाको हत्या गरेको प्रहरी नायब उपरीक्षक सुमित खड्काले अनलाईन न्युजपाटीलाई जानकारी दिए ।श्रीमतीको हत्या गरी फरार रहेका नवीनलाई मंगलबार बिहान २:१५ बजेको समयमा घरनजिकैको जंगलमा लुकेर बसेको अवस्थामा पक्राउ गरिएको प्रहरी नायब उपरीक्षक खड्काले बताए ।उनीसँगै श्रीमतीलाई प्रहार गरेको खुर्पा पनि बरामद गरिएको छ । उनले के कारणले श्रीमतीको हत्या गरेका हुन् भन्ने कारण खुलिनसकेको प्रहरीले जनाएको छ ।घटनाकाबारेमा थप अनुसन्धान भइरहेको प्रहरीको भनाइ छ ।