अनलाईन न्युजपाटी,दाङ्ग ,समाचारदाता, भदौ २३गते ।
ठगी मुद्दाको आरोप लागेका व्यक्ति अस्पतालबाट फरार भएपछि दाङका एक प्रहरी निलम्बनमा परेका छन् । तुलसीपुर उपमहानगरपालिकाका २३ वर्षीय विकासराज गुरु राप्ती स्वास्थ्य विज्ञान प्रतिष्ठान घोराहीमा उपचारका लागि लगिएको समयमा त्यहीँबाट फरार भएको प्रहरीले बताएको छ । अस्पतालमा उपचार गराउँदा गराउँदै गुरु फरार भएपछि उनको सुरक्षामा अस्पतालमा खटिएका प्रहरी जवानलाई निलम्बन गरेको जिल्ला प्रहरी कार्यालय दाङले जनाएको छ । जिल्ला प्रहरी कार्यालय दाङका प्रहरी नायब उपरीक्षक विनोदविक्रम शाहले भने, “अहिले फरार अभियुक्तको खोजी कार्य भइरहेको छ ।” विकासराज गुरु भदौ ३ गते ठगी गरेको आरोपमा पक्राउ परेका थिए । जागिर लगाइदिन्छु भन्दै लाखौं रुपैयाँ ठगेको आरोपमा उनलाई प्रहरीले पक्राउ गरेको थियो । उनीमाथि चौधरी एग्रिकल्चर संस्थामा जागिर मिलाइदिन्छु भन्दै ६ जनालाई सेयर हाल्न लगाएर ठगी गरेको आरोप छ ।