आज जनकपुरधाममा भगवान् सीताराम विवाह महोत्सव मनाइँदै

अनलाईन न्युजपाटी ,जनकपुरधाम,समाचारदाता,मंसिर १२ गते। 

आज जनकपुरधाममा हर्षोल्लासपूर्वक भगवान् सीताराम विवाह महोत्सव मनाइँदै छ।

महोत्सवका कारण जनकपुरको जानकी मन्दिर क्षेत्रमा दर्शनार्थीको घुइँचो लागेको छ।

विवाहपञ्चमी महोत्सवअन्तर्गत आज राम र सीताको वैवाहिक कार्यक्रम छ।

वैवाहिक कार्यक्रममा सहभागी हुन भारतबाट समेत हजारौं दर्शनार्थी जनकपुर आएका छन् ।

रंगभूमि मैदानमा राम र सीताको स्वयम्वर हुनेछ । स्वयम्वर पश्चात राम र जानकीको डोलालाई नगर परिक्रमा गर्दै जानकी मन्दिरमा पुगेर साँझदेखि विवाहको काज सुरु हुन्छ । राम र सीताको विवाहको लागि यसवर्ष पनि जानकी मन्दिरको प्रांगणमा विवाह मण्डप अर्थात मरबा बनाइएको छ । राम र जानकीको विवाहको लागि जानकी मन्दिरलाई नवदुल्ही झै सृंगारिएको छ ।

बैबाहिक कार्यक्रममा भगवान रामका बुबा राजा दशरथको भूमिकामा राम मन्दिरका महन्थ राम गिरी र सीताको पिता राजा जनकको भूमिकामा जानकी मन्दिरका महन्थ रामतपेश्वर दास बैष्णवले भूमिका निर्वाह गर्दछन् ।

मंसिर ७ गतेबाट सुरु भएको सप्ताहव्यापरी विवाहपञ्चमी महोत्सवको पहिलोदिन नगर दर्शन, दोश्रो दिन फुलवारी लिला, तेश्रो दिन धनुष यज्ञ, चौथो दिन तिल्कोत्सव, पाँचौ दिन दिन मटकोर तथा पूजा कार्यक्रम सम्पन्न भइसकेको छ । आज सीतारामको विवाहको कार्यक्रम सम्पन्न भएपछि भोली रामकलेवा गरी जन्ती एवं साधुशन्तालाई विदाई गर्दै विधिवत रुपमा विवाहपञ्चमी महोत्सव समापन हुने छ ।

विवाहपञ्चमीलाई मध्यनजर गर्दै जनकपुरमा व्यापक मात्रामा सुरक्षाकर्मी परिचालन गरिएको छ ।

विवाहपञ्चमीको अवसरमा मधेश प्रदेशमा आज सार्वजनिक विदा रहेको छ ।

Leave a Reply

Your email address will not be published. Required fields are marked *