अनलाईन न्युजपाटी काठमाडौँ,समाचारदाता, असार २६ गते
आज आषाढ शुक्ल पूर्णिमा अर्थात गुरु पूर्णिमा ,गुरुप्रति श्रद्धाभाव प्रकट गरी मनाइँदै छ ।
हिन्दूधर्म शास्त्रहरुमा गुरुको वर्णन यसरी गरिएको छ ।
गुरुब्रह्मा गुरुर्विष्णुः गुरुर्देवो महेश्वरः ।
गुरुः साक्षात् परं ब्रह्म तस्मै श्रीगुरवे नमः ॥
अर्थात् गुरु नै ब्रह्मा हुन्, गुरु नै विष्णु हुन्, गुरु नै महेश्वर हुन् । गुरु नै प्रत्यक्ष परम ब्रह्म हुन् । ती गुरुलाई म नमस्कार गर्छु ।
गुरु शब्द ‘गु’ र ‘रु’ बाट बनेको हो । ‘गु’ को अर्थ अन्धकार र ‘रु’ को अर्थ प्रकाश दिने भनिन्छ । अर्थात् जो अज्ञानताको अन्धकारलाई हटाएर ज्ञानको प्रकाश दिन्छ, त्यो गुरु हो । गुरु न केवल शैक्षिक ज्ञान दिने व्यक्ति हो, तर आध्यात्मिक र नैतिक जीवनका पथप्रदर्शक पनि हुन् ।
गुरु बिना ज्ञान सम्भव छैन भन्ने मान्यता छ । वैदिक कालदेखि नै गुरुकुल प्रणालीद्वारा शिक्षा लिने प्रचलन थियो, जहाँ शिष्यहरू गुरुको आश्रममा बसेर विद्यादान प्राप्त गर्थे । गुरु पूर्णिमाको दिन विद्यार्थीहरू गुरुका पाउमा फूलमाला, अक्षता, दक्षिणा अर्पण गरी आशीर्वाद लिन्छन् ।