अनलाईन न्युजपाटी,काठमाडौँ,समाचारदाता, असार २२ गते।
जल तथा मौसम पूर्वानुमान महाशाखाले सोमबार देशभर सामान्यदेखि पूर्ण बदली रही धेरै स्थानमा पानी पर्ने सम्भावना रहेको जनाएको छ ।
अहिले देशभर मनसुनी वायुको प्रभाव रहेको छ । यस्तै भारतको उत्तर प्रदेशको उत्तर–पूर्वी भू–भाग नजिक रहेको निम्न चापीय क्षेत्र प्रभाव पनि कायम छ । हाल देशभर सामान्यदेखि पूर्ण बदली रही प्रदेश नम्बर १, बागमती प्रदेश, गण्डकी प्रदेश, प्रदेश ५ र कर्णाली प्रदेशका केही स्थानमा हल्का वर्षा भइरहेको छ ।
सोमबार दिउँसो देशभर अधिकांश क्षेत्रमा बदली रहनेछ । सुदूरपश्चिम प्रदेश, कर्णाली प्रदेश, प्रदेश ५, गण्डकी प्रदेश र बागमती प्रदेशका धेरै स्थान र प्रदेश १ तथा प्रदेश २ का केही स्थानमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको छ । प्रदेश ५, गण्डकी प्रदेश र प्रदेश १ का एक–दुई स्थानमा भारी वर्षाको सम्भावना रहेको मौसमविदले बताएका छन् ।