अनलाईन न्युजपाटी,जनकपुरधाम,समाचारदाता,असार २३ गते।
नेपालका पूर्वराजा ज्ञानेन्द्र शाह ज्यूको आज ७५ औँ जन्म जयन्ती रहेको छ।
जन्म जयन्तीको अवसरमा आज राष्ट्रवादी नागरिक समाज धनुषा र नेपाल राष्ट्रवादी समुहको संयुक्त आयोजनामा प्रदेश नं-२ को अस्थायी राजधानी जनकपुरधामको जनक चौकमा जन्मोत्सव कार्यक्रमको आयोजना गरि राष्ट्रिय एकताको प्रतीक प्रजावत्सल राष्ट्र नायक श्री ५ महाराजाधिराज ज्ञानेन्द्र वीर विक्रम शाह देव सरकारको ७५ औं जन्म जयंती राष्ट्रिय गान (श्रीमान गम्भीर नेपाली ) बजाउँदै फुलमाला अर्पण गरि सभ्यताको साथ मनाएका छन्।
जन्म जयन्ती कार्यक्रममा सहभागी सबैले माँ जानकी संग महाराजधिराज सरकारको सुख,शान्ति , सुस्वास्थ्य तथा दीर्घायु जीवन का साथै मौसुफ महाराजाधिराज सरकारबाट पुनः श्रीपेच लगाई नेपाली राष्ट्रिय अभिभावकको भुमिका निर्वाह गर्दै देश र जनताको हितका लागि तथा धर्म ,संस्कृति , परम्परा र पहिचान जोगाउन यथाशीघ्र राजगद्दी प्राप्त गरुन् भनी कामना/प्रार्थना गरेका हुन्।
कार्यक्रममा राष्ट्रवादी नागरिक समाज धनुषाका संयोजक मुन्नु झा, उपसंयोजक नविन झा, कोषाध्यक्ष सुदिप झा , प्रतिनिधि प्रेम झा, नेपाल राष्ट्रवादी समुह धनुषा जिल्ला अध्यक्ष कारी यादव, संस्थापक प्रकाश राणा, जितेन्द्र शाह लगायत राष्ट्रवादी नागरिक समाजका प्रतिनिधिहरुको उपस्थितिमा पुर्व राजा ज्ञानेन्द्र शाहको जन्म जयन्ती मनाइएको छ।