अनलाईन न्युजपाटी,राजविराज,समाचारदाता, पौष २३ गते।
नागरिकता बनाई दिन माग गर्दा मंगलबार दिउँसो आफ्नै पत्नीमाथी पतिले खुकुरी प्रहार गरि हत्याको प्रयास गरेका छन् । सप्तरी सदरमुकाम राजविराज नगरपालिका १२ दमाबती टोल निवासी २८ बर्षिया लक्ष्मी यादवमाथि पती महि नारायणले खुकुरी प्रहार गरी हत्या प्रयास गरेका हुन् । महिनारायण पुर्व प्रहरी हुन् । खुकुरी प्रहारबाट लक्ष्मीको टाउँको र घाटीमा गम्भीर चोट लागेको छ । उनको टाउँको र घाटीमा गरी ३६ वटा टाका लगाइएको अस्पताल प्रशासनले जनाएको छ । यस्तै लक्ष्मीको जिउँभर निलडाम समेत देखिएको छ । उनलाई स्थानिय गजेन्द्र नरायण सिंह अस्पतालको आकस्मिक कक्षमा प्रारम्भिक उपचार पछि थप उपचारका लागी धरानस्थित विपी कोइराला स्वास्थ्य विज्ञान प्रतिष्ठान पठाइएको छ । लक्ष्मीको अवस्था गम्भीर बन्दै गएपछि परिवारजनको आग्रहमा थपउपचारका लागी रेफर गरिएको उनको उपचारका संलग्न डा. प्रमोद कुमार यादवले जानकारी दिएका छन् । दिउँसो लक्ष्मी तरकारी बारीतर्फ जाँदै गर्दा उनका पति महिनारायण मोटरसाईकलबाट आर्लेर नागरिकता बनाई दिनु भन्दै टेन्सन दिन्छस भन्दै एक्कासी अन्धाधुन्द खुकुरी प्रहार गरेको लक्ष्मीका हजुरबुवा शिव नारायणले बताए । खुकुरी प्रहारबाट खेतमै लक्ष्मी ढल्दा मरेको ठानेर पति महिनारायण खुकुरी नजिकैको नहरमा फ्याली फरार भएको उनले सुनाए । लक्ष्मीका पति महि नारायणले केही महिना अघि मात्र दोस्रो बिहे गरका थिए । बिहेको १० वर्ष भन्दा बढी भई सक्दा पनि लक्ष्मीलाई नागरिकता नबनाई अर्को विवाह गरेपछि संशकित बनेकी लक्ष्मीले पटक पटक नागरिकता बनाई दिन दवाव दिदै आएकी थिईन ।
यसबारे गाउँमा पटक पटक पंचायती बसी लक्ष्मीको नागरिकता बनाईदिने पति महि नारायणले प्रतिबद्धता गरेपनि आलटाल गर्दै आएको स्थानिय गाउँलेले बताएका छन् । सोही विषयमा लक्ष्मीले मंगलबार पनि गाउँमा कुरा उठाउने तयारी गरीरहँदा आक्रोशित बनेका महिनारायणले हत्या प्रयास गरेको स्थानियको भनाई छ । यता घटना पछि फरार रहेका महि नारायणको खोजी कार्य तिब्र बनाईएको प्रहरी नायब उपरिक्षक तिलक भारतीले जानकारी दिए ।