अनलाईन न्युजपाटी,काठमाडौँ,समाचारदादाता,माघ १६ गते।
टेलिकम कम्पनीको फोरजी सेवा बिस्तारको ठेक्का पाएको कम्पनीबाट तार चोरी गर्ने तीन जना कर्मचारीलाई प्रहरीले पक्राउ गरि बिहीबार सार्वजनिक गरेको छ ।तार चोरी गरेर कवाडीलाई बेचेको आरोपमा उनीहरु पक्राउ परेका हुन् । काठमाडौंका विभिन्न स्थानबाट उनीहरूलाई पक्राउ गरेको हो । पक्राउ पर्नेमा कीर्तिपुरका ३२ वर्षीय नरेन्द्र केसी, सर्लाही घर भइ कलंकी बस्ने ४६ वर्षीय पन्नालाल साह र सिन्धुपाल्चोक घर भइ टौदह बस्ने ३५ वर्षीय श्याम श्रेष्ठ छन् । केसीलाई मंगलबार कीर्तिपुरबाटै पक्राउ गरेपछि उनले नै श्रेष्ठको गाडी प्रयोग गरी तार चोरेर लगेको र साहलाई बेचेको खुलेको थियो । उनीहरूका साथ प्लास्टिक हटाइएको तामाको एक क्विन्टल तार र चोरीका क्रममा प्रयोग गरिएको बा ८ च ८०१६ नम्बरको गाडी नियन्त्रणमा लिएको छ । नेपाल टेलिकमको फोरजी सेवा विस्तारको ठेक्का पाएको कम्पनीको गोदामबाट शनिबार बिहान तार चोरी भएको थियो । ‘यस अघि पनि त्यहाँ चोरीको घटना भएका छन्,’ कीर्तिपुर वृत्तका डिएसपी छेदिलाल कामतीले भने, ‘हामी त्यसबारे पनि अनुसन्धान गर्दैछौं ।’ बजार मूल्य प्रति केजी १८ सय रूपैयाँ पर्ने तार उनीहरूले ५ देखि ७ सय रूपैयाँमा कवाडीलाई बेचेको उनले बताए ।