नितिश कुमार द्धारा लगातार चौथोपटक बिहारको मुख्यमन्त्रीका रुपमा शपथ ग्रहण

अनलाईन न्युजपाटी एजेन्सी,समाचारदाता, मङ्सिर २ गते

नितिश कुमारले लगातार चौथोपटक बिहारको मुख्यमन्त्रीका रुपमा शपथ ग्रहण गरेका छन् । कोभिड महामारीका बीच पटनामा आयोजित समारोहमा नितिशले सोमबार शपथ लिएका हुन् । 

सात पटक बिहारका मुख्यमन्त्री बनेका नितिश कुमारले सन् २००५ यता लगातार चौथो कार्यकालका लागि शपथ लिएका हुन् । बीचमा भने सन् २०१४ को लोकसभा चुनावमा उनको दलको प्रदर्शन राम्रो नभएपछि मुख्यमन्त्रीबाट राजीनामा दिएका थिए । सन् २०१४ को मे २० देखि २०१५ को फेब्रुअरी २२ सम्म जेडीयूकै जितनराम माझी बिहारका मुख्यमन्त्री भएका थिए ।

नितिश कुमारले १४ सदस्यीय मन्त्रीमण्डल पनि गठन गरेका छन् । उनको मन्त्रिमण्डलमा दुईजना उपमुख्यमन्त्री तारकिशोर प्रसाद र रेनु देवी छन् । दुवै भाजपाका नेता हुन् । पूर्वमुख्यमन्त्री जितनराम माझीका छोरा सन्तोषकुमार सुमनले पनि मन्त्रीको सपथ लिएका छन् । सपथ ग्रहण समारोहमा भाजपा नेता केन्द्रीय गृहमन्त्री अमित शाह र भाजपा अध्यक्ष जेपी नड्डा पनि उपस्थित थिए ।

महामारीकै बीच भएको निर्वाचनमा जेडी (यु) र भाजपाको गठबन्धनले बहुमत पाएको हो । बिहार विधानसभामा सबभन्दा ठूलो दल बनेको राष्ट्रिय जनता दलका नेता तेजश्वी यादव भने सपथ ग्रहणमा अनुपस्थित थिए ।

Leave a Reply

Your email address will not be published. Required fields are marked *