अनलाईन न्युजपाटी ,जनकपुरधाम,समाचारदाता,चैत्र १२ गते।
मिथिलामा चैती छठ पर्वको आज दोश्रो दिन खरना गरिँदै छ ।
चैत शुक्ल चतुर्थीदेखि सप्तमीसम्म चार दिन विभिन्न विधिसाथ मनाइने पर्वको पहिलो दिन ब्रतालुले ‘नहाय–खाय’ विधिबाट पर्व प्रारम्भ गर्दै छन्।
पर्वको आज दोस्रो दिन खरना अर्थात् पापको क्षयको रूपमा लिइन्छ। गाईको गोबरले लिपपोत गरी अरवा चामलको पिठोबाट तयार पारेको झोलले भूमि सुशोभित गरेर व्रती महिलाले यो दिन दिनभरि निर्जला व्रत बस्ने गर्दछन् । राति चन्द्रोदयपछि चन्द्रमालाई खीर चढाई सो खीर प्रसादको रूपमा ग्रहण गर्ने गरिन्छ ।
तेस्रो दिन अर्थात् षष्टि तिथिमा निराहार उपवास बसेर साँझ अस्ताउँदो सूर्यलाई पवित्र जलाशयको घाटमा कम्मरसम्म पानीमा चोवलिएर अघ्र्य दिइन्छ, जसलाई ‘सझुका अरख’ भनिन्छ ।
अन्तिम दिन सप्तमीका दिन बिहान उदाउँदो सूर्यलाई घाटमै अघ्र्य दिएर पर्व सम्पन्न गरिन्छ । यो विधिलाई ‘भोरका अरख’ भनिन्छ । छठपर्वमा ठकुवा, भुसुवा (कसार)सहितका मिष्ठान्न परिकारसहित पाकेका केराको घरी र अन्य फलफूल तथा दहीसहितका सामग्री बर्तालुले अर्घका बेला सूर्यतर्फ देखाउने गर्छन् ।
नेपालको तराई क्षेत्र तथा उत्तरी भारतमा मनाइँने छठ पर्व धुमधामका साथ मनाईन्छ । निँकै कठिन मानिने यो पर्वका चार दिन मध्ये दुई दिन छठ ब्रतालुहरुले अन्न–पानी नखाई भोकै बसी ब्रत गर्दछन् ।
तराई क्षेत्रको हरेक गाउँमा नदि, पोखरी, तलाउ लगायतको जलाशयमा चैती छठ पर्वका लागी छठ घाट सजाउँने कार्य गरिरहेका छन् ।